كل ما يخص تفصيلا زيت فتيس السيراتو ال 6 نقلات الاتوماتيك (الفتيس الجديد الكهرباء)

الموضوع اللي فات اتكلمنا عن زيت الفتيس ال 4 نقلات وكل التفاصيل الخاصه بنوعه وتغييره

وبما ان تكنولوجيا الفتيس الاربع نقلات مختلفه تماما عن الفتيس الست نقلات بالتالي ليه لزوجة زيت خاصه بيه وطريقة تغيير مختلفه عن الفتيس الاربع نقلات وكل ده هنتكلم عنه بالتفصيل في النقط الجايه :

أولا : لزوجة زيت الفتيس الست نقلات atf sp lv ولون علبته زرقاء زي اللي في الصوره بالظبط وعبوته 1 لتر فقط ومفيش منه عبوات اكبر بخلاف الاربع نقلات الزيت بتاعه في منه عبوه لتر وعبوه 4 لتر.

ثانيا :. بنأكد الزيت لازم يتجاب من مكان ثقه علشان ميكونش تقليد وسعره متفاوت من مكان للتاني وموجود عند محلات قطع الغيار الكبيره او مركز الصيانه

ثالثا : الفتيس الست نقلات فيه 7 لتر و 3 من عشره زيت لما بنفك طبة الزيت بينزل بالظبط 5 لتر الا حاجه بسيطه جدا وباقي الزيت بيكون موجود داخل اجزاء الفتيس مش بتنزل.

توكيلات الخارج بتعمل طريقه مفيش اي حد في مصر بيعملها وهي انهم بعد ما يغيرو ال 5 لتر بيخلي العربيه تمشي شهر ويرجع تاني التوكيل يغير زيت الفتيس تاني وبيكون الهدف من كده ان الزيت الجديد يختلط مع الزيت القديم اللي منزلش في الغيار الاول وبكده لما يغير زيت لتاني مره يكون ضمن ان الفتيس فيه أكبر كم زيت جديد.

رابعا : الفتيس الست نقلات حسب دليل المستخدم يعتبر فتيس مغلق مدى الحياة بمعنى أنه لا يحتاج إلى صيانة locked for life وعلشان كده فلتر الزيت الداخلي اللي فيه مش بيتغير خالص الا لو حصل تلف في الفتيس وتم فتحه وتصليحه يعني ملوش كارتيره بتتفك زي الفتيس الاربع نقلات ولا الفلتر بيتغير زي الفتيس الاربع نقلات.

خامسا : حسب دليل المستخدم بيتم تغيير زيت الفتيس ال 6 نقلات كل 100 الف كيلو معادا الظروف القاسيه زي ارتفاع درجة الحرارة أوالقيادة الرياضيه أو صعود مرتفعات وغيرها في الحاله دي بيتم تغيير الزيت عند 80 الف كيلو.

التوكيل في مصر بيعتبر ظروف القياده في مصر قاسيه علشان كده في جدول الصيانه الدوري التوكيل بينصح بتغيير الزيت عند 80 الف كيلو.

بالرغم من ان توكيل غبور بتاع هيونداي بيغير زيت الفتيس للهيونداي md الست سرعات اللي هو نفس الفتيس بتاع الكيا بالظبط علي 100 الف كيلو.

طيب الخلاصه نسمع كلام التوكيل بتاعنا وخلاص ونغير علي 80 الف كيلو علشان نقلل المخاطره اللي ممكن تحصل علي الفتيس حتي لو كنا شاكين في صحة الكلام ده.

واخيرا طريقة التغيير : بالنسبه للفتيس الست نقلات ليه 3 طبات

الاولي من فوق لوضع الزيت

التانيه من الاسفل خالص لتنزيل الزيت

التالته و دي الاهم بتاعه القياس لان الفتيس ده ملوش مقياس زيت زي الفتيس الاربع نقلات

العربيه لازم تكون بارده خاااالص والفتيس على وضع ال p

بنفتح الطبه اللي تحت علشان تنزل الزيت القديم ويفضل انه ينزل في جركن علشان نعرف الكميه اللي نزلت بالظبط ونحط كميه مساويه ليها واللي بينزل بالظبط بيكون 5 لتر الا حاجه بسيطه اوي

بعد الزيت القديم ما ينزل بنقفل الطبه ونحط الزيت من الطبه اللي فوق

وبعدين لو حبينا نتأكد من المقاس بنمشي بالعربيه مشوار ونركنها 10 دقايق وبنفتح طبة القياس نشوفها هتجيب زيت و لا لا لو جابت زيت كده بيكون المقاس مظبوط.

نتمني يكون الموضوع شامل لكل الاستفسارات الخاصه بزيت الفتيس الست نقلات وتكونوا استفادتوا منه جميعاً.